Margrét Lára: Við munum koma sterkari til leiks í næsta leik

Margrét Lára Viðarsdóttir segir íslensku stelpurnar ætli að koma sterkar til baka í Noregsleiknum þrátt fyrir að vera langt niðri eftir tapið á móti Frökkum í kvöld.

„Hlutirnir gerast bara í fótbolta, maður verður bara að taka því og standa það af sér. Við verðum bara að koma sterkari til leiks næst," sagði Margrét Lára.

Hún segist ekki hafa verið í aðstöðu til að sjá hvort hin umdeildu vítaspyrnur Frakka hafi verið réttmætar. „Ég er ekki rétta manneskjan til þess að dæma um þessi víti því ég var alveg hinum megin á vellinum. Samkvæmt stelpurnum þá voru þær mjög óhressar með þetta. Ég held að það hafi ekki skilið á milli. Frakkarnir voru að spila vel, voru betri en við og þess vegna unnu þær. Ég held að það hafi ekki verið þessum vítum að kenna," sagði Margrét Lára.

Hún er viss um að liðið nái sér á strik á nýjan leik. „Það einkennir þennan hóp stemmning, gleði og samheldni. Ég held að það muni skína í gegn núna. Við höfum tvo daga til að undirbúa okkur og við erum hvergi bangnar. Við munum koma sterkari til leiks í næsta leik," sagði Margrét og bætti við:

„Við eigum möguleika á fimmtudaginn að halda í þessa von um að komast áfram í átta liða úrslitin. Við verðum því bara að vinna Noreg," sagði Margrét Lára.