Allt of stórt tap hjá Norðmönnum gegn Þýskalandi

Norðmenn fóru afar illa að ráði sínu gegn Þýskalandi í opnunarleik B-riðils á EM kvenna í Tampere í dag.

Eftir að hafa staðið í Þjóðverjum allan leikinn fengu norsku stelpurnar þrjú mörk á sig undir lokin og töpuðu, 4-0.

Linda Bresonik kom Þýskalandi yfir um miðjan fyrri hálfleik úr umdeildri vítaspyrnu sem Hjelmseth var nærri búin að verja en norski markvörðurinn átti stórleik í dag.

Það var síðan ekki fyrr en á 90 mínútu sem Þjóðverjum tókst aftur að skora og þar var að verki varamaðurinn Bajramaj.

Norsku stúlkunum féll allur ketill í eld í kjölfarið og Norðmenn gáfu tvö mörk í uppbótartíma. Afar klaufalegt og algjör óþarfi.

Mörkin skoruðu Bajramaj og Mittag.