Stjórnlagaþingið gæti kostað tæpar 300 milljónir

Framsóknarflokkurinn kynnti í dag frumvarp um svokallað stjórnlagaþing sem á að semja nýja stjórnarskrá. Flokkurinn setur þetta sem eitt af skilyrðum fyrir því að verja ríkisstjórn Samfylkingar og VG. Gert er ráð fyrir að 63 fulltrúar verði kosnir í almennum kosningum til setu á þinginu. Þingið myndi starfa í allt að sex mánuði, en möguleiki væri að framlengja störf þess. Gert er ráð fyrir að fulltrúarnir verði á þingfararkaupi.

Þrjúhundruð undirskriftir þyrfti til að geta boðið sig fram til setu á stjórnlagaþinginu, en þingmenn, ráðherrar, dómarar Hæstaréttar og forseti geta samkvæmt frumvarpinu ekki boðið sig fram.

Miðað við að fulltrúarnir verði 63 , á þingfararkaupi sem er 520 þúsund á mánuði, í hálft ár gerir það tæpar 197 milljónir króna. Möguleiki er á því að þingið starfi í tvo mánuði til viðbótar en þá myndi þessi aðgerð kosta um 262 milljónir króna.

Þá er ekki gert ráð fyrir þeim kostnaði sem færi í kosningu fulltrúanna auk þeirrar vinnu sérfræðinga sem koma að því að semja nýja stjórnarskrá, auk aðstöðu fyrir fulltrúanna.