David James: Vonandi hættir að selja frá okkur leikmenn

David James, markvörður og liðsfélagi Hermanns Hreiðarssonar hjá Portsmouth, vonast til þess að enska úrvalsdeildarliðið missi ekki fleiri leikmenn frá sér fyrir komandi tímabil.

Portsmouth varð enskur bikarmeistari vorið 2008 en síðan hefur liðið misst mikið af mönnum og nú síðast voru þeir Peter Crouch og Glen Johnson seldir. Peter Crouch fór til Tottenham og Glen Johnson til Liverpool.

„Þetta verður mjög erfitt tímabil fyrir okkur en vonandi erum við hættir að selja frá okkur leikmenn," sagði David James og bætti við: „Við erum orðnir mjög þunnskipaðir og það eru fullt af ungum leikmönnum og leikmönnum á reynslu í hópnum," sagði James.

Portsmouth hefur verið þvingað til þess að selja leikmenn til þess að fá pening inn í félagið og koma fjármálum þess í betra horf. Það er því ekki nýir leikmenn á leiðinni í staðinn fyrir þá sem fóru á brott ekki nema að nýr eigandi komi með peninga inn í félagið.

Það er vitað af áhuga milljarðamæringsins Sulaiman Al Fahim en það ætlar þó að dragast eitthvað að hann nái samningum við fyrri eiganda Portsmouth.