Forseti pólska sambandsins rak Beenhakker í sjónvarpsviðtali eftir leikinn

Stórtap Pólverja á móti Slóveníu í undankeppni HM í gær kostaði þjálfarann Leo Beenhakker starfið. Forseti pólska knattspyrnusambandsins var ekkert að bíða með ákvörðun sína heldur rak Beenhakker í sjónvarpsviðtali eftir leikinn.

Pólverjar eiga eftir leikinn nánast enga möguleika á að komast á HM. Pólverjar verða vinna báða sína leiki, sem eru á móti toppliði Slóvaka og á útivelli á móti Tékkum, auk þess að treysta á önnur úrslit.

„Ég vil ekki taka neinar skyndiákvarðanir en þessu verður ekki breytt. Þetta var síðasti leikur Leo sem þjálfara liðsins," sagði Grzegorz Lato, forseti pólska knattspyrnusambandsins í sjónvarpsviðtali eftir leikinn.

„Við vorum hræðilegir á móti Slóvenum og það þarf eitthvað að breytast. Við erum að leita að nýjum þjálfara en hugsanlega hleypur einhver tímabundið í skarðið í þessum tveimur leikjum sem við eigum eftir í undankeppninni," sagði Lato.

Leo Beenhakker er 67 ára Hollendingur og varð fyrsti erlendi þjálfari pólska landsliðsins frá upphafi þegar hann tók við liðinu árið 2006. Hann kom Póllandi á EM 2008 en liðið hefur nú aðeins unnið 3 af fyrstu 8 leikjum sínum í undankeppni HM.