Dómari í bann fyrir að sýna áhorfendum fingurinn

Svissneski dómarinn Massimo Busacca hefur verið dæmdur í þriggja leikja bann fyrir að sýna stuðningsmönnum Young Boys fingurinn í miðjum bikarleik liðsins á móti 3. deildarliðinu FC Baden um helgina.

Massimo Busacca er frægasti dómari Svisslendinga en hann dæmdi meðal annars úrslitaleik Meistaradeildarinnar á síðasta tímabili en þar mættust Barcelona og Manchester United.

Massimo Busacca baðst afsökunar á hegðun sinni og sagði að hann hefði ekki átt að leggjast jafnlágt og umræddir stuðningsmenn.

Busacca, sem er fertugur, talar fimm tungumál og er í hópi bestu dómara Evrópu. Hann hefur verið alþjóðlegur dómari í tíu ár og dæmdi á bæði HM 2006 og EM 2008.