The Sun: Mark Hughes verður rekinn um helgina

Enska götublaðið The Sun heldur því fram í dag að Mark Hughes verði rekinn um helgina, jafnvel þótt að Manchester City vinni Sunderland í dag.

Eigendur City eru sagðir hafa misst trúna á Hughes eftir að liðið tapaði fyrir Tottenham á miðvikudaginn, 3-0. Þetta var aðeins annað tap City í vetur en liðið hefur gert átta jafntefli og er í áttunda sæti deildarinnar.

Guus Hiddink og Jürgen Klinsmann hafa verið orðaðir við stöðu knattspyrnustjóra hjá City sem og Arsene Wenger, núverandi stjóri Arsenal.

Hughes var ráðinn stjóri City í júní árið 2008 og hefur keypt leikmenn fyrir samtals 250 milljónir punda síðan þá.

City vann á dögunum 3-0 sigur á Arsenal í enska deildabikarnum og lagði svo topplið Chelsea, 2-1. En liðið gerði svo 3-3 jafntefli við Bolton um síðustu helgi og tapaði svo fyrir Tottenham á miðvikudaginn sem fyrr segir.