Lið Eiðs og Veigars mætast í kvöld

AS Nancy og AS Monaco mætast í fyrstu umferð frönsku deildarbikarkeppninnar í kvöld. Sem kunnugt er leika Íslendingar með báðum þessum liðum. Veigar Páll Gunnarsson er á mála hjá Nancy og Eiður Smári Guðjohnsen gekk til liðs við Monaco í haust.

Eiður Smári hefur verið í byrjunarliði Monaco í báðum sínum leikjum með félaginu til þessa.

Veigar Páll hefur hins vegar fá tækifæri fengið með Nancy síðan hann fór til félagsins um síðustu áramót.

Hann var á bekknum í fyrstu tveimur leikjum liðsins á tímabilinu en hefur ekki verið í leikmannahópnum síðan þá. Hann gæti þó fengið tækifæri til að sýna sig og sanna í kvöld.