Berbatov reitir búlgarskan mafíósa til reiði

Enska dagblaðið The Sun heldur því fram að Dimitar Berbatov, leikmaður Manchester United, sé kominn í ónáð hjá búlgörsku mafíunni.

Berbatov mun hafa sent nokkur svæsin SMS-skilaboð til fyrirsætunnar Nikoleta Lozanova sem var kjörin Playboy-kanína ársins þarlendis árið 2006.

Hún er hins vegar einnig kærasta Georgi Stoilov, mafíósa sem er einnig þekktur sem Hausinn. Sá þykir vera einstaklega ofbeldishneigður í þokkabót og mun hafa sent Berbatov skýr skilaboð - að láta Lozanova í friði.

Blaðið hefur hins vegar eftir vinum Berbatov að stúlkan sé ímyndunarveik og hafa skáldað skilaboðin. Sjálfur neitar Berbatov því staðfastlega að hafa nokkuð skipt sér af ástarlífi hennar.