Bassong nálgast Tottenham

Samkvæmt heimildum Sky Sports fréttastofunnar er varnarmaðurinn Sebastien Bassong hjá Newcastle nálægt því að ganga í raðir Tottenham en Harry Redknapp knattspyrnustjóri Lundúnafélagsins lýsti yfir áhuga á leikmanninum á dögunum.

Talið er að félögin tvö hafi komist að samkomulagi um 8 milljón punda kaupverð fyrir hinn 23 ára gamla leikmann og að hann sé þegar búinn að gangast undir læknisskoðun hjá Tottenham. Frakkinn ungi var einnig orðaður við Manchester City, Everton og Arsenal.

Redknapp er sagður hafa lagt mikið kapp á að fá Bassong til þess að þétta varnarlínu sína þar sem varnarmennirnir Ledley King, Jonathan Woodgate og Michael Dawson hafa allir meiðst á undirbúningstímabilinu.