Ísland féll um fjögur sæti á heimslistanum

Nýr styrkleikalisti Alþjóða knattspyrnusambandsins, FIFA, var gefinn út í morgun. Ísland er í 96.-97. sæti listans, ásamt Súdan, og hefur fallið um fjögur sæti frá þeim síðasta.

Ísland hefur leikið einn leik síðan að síðasti listi var gefinn út en í honum gerði liðið 1-1 jafntefli við Slóvakíu í vináttulandsleik á Laugardalsvelli.

Á laugardaginn mætir liðið Noregi í lokaleik sínum í undankeppni HM 2010 og svo Georgíu í vináttulandsleik á miðvikudaginn í næstu viku. Báðir leikir fara fram á Laugardalsvelli. Noregur er í 43. sæti listans og fer upp um sjö sæti en Georgía er í 112. sæti og fellur um níu sæti.

Ísland hefur fallið um 21 sæti síðan í mars á þessu ári og hefur ekki verið jafn neðarlega á listanum og síðan í október í fyrra.

Tvær breytingar eru á milli listanna hvað efstu tíu þjóðirnar varðar. Ítalía og Þýskaland eru nú jöfn að stigum í 4. og 5. sæti og þá hafa Króatía og Frakkland sætaskipti í 9. og 10. sætinu.

Brasilía er enn í efsta sæti listans en Spánverjar eru ekki langt undan í öðru sæti. Holland er í þriðja sæti. Rússland er í sjötta sæti, England í sjöunda og Argentína í áttunda.