Arsene Wenger ætlar að spila sama leikkerfi og Barcelona

Arsene Wenger, stjóri enska úrvalsdeildarliðsins Arsenal, er búinn að breyta leikkerfi liðsins en hann ætlar að reyna að þétta miðjuna með því að spila leikkerfið 4-3-3 í stað hins hefðbundna 4-4-2.

Brotthvarf leikmannanna Kolo Toure og Emmanuel Adebayor sem og koma Andrey Arshavin hafa kallað á þessa breytingu hjá franska stjóranum því hann ætlar sér að reyna nýta leikmannahóp sinn sem best.

Arsenal hefur spilað 4-3-3 kerfið allt undirbúningstímabilið og hefur hann líkt eftir kerfinu hjá Barcelona þar sem sóknarmenn liðsins geta hreyft sig mun frjálsar en áður. Barcelona varð eins og kunnugt er þrefaldur meistari á síðasta tímabili.

„Ég vildi sjá hvernig þetta myndi virka hjá okkur. Ég er með marga sóknarmenn og ég þurfti að styrkja betur miðjuna til þess að halda jafnvæginu á milli sóknar og varnar. Ég er mjög ánægður með það hvernig þetta hefur gengið," sagði Arsene Wenger.