Hægt að fylgjast með leiknum á risastórum skjá á vellinum

Áhorfendur á leikjunum tveimur í EM kvenna í Tampere í gær gátu ekki bara horft á sjálfan leikinn því þeir gátu einnig fylgst með sjónvarpsmyndum á risastórum sjónvarpsskjá í annarri endastúku vallarsins.

Skjárinn er er mjög stór og honum hefur verið komið fyrir í sjálfri stúkunni þannig að hann tekur líklega um 200 sæti. Myndin er mjög skýr og góð og það sést mjög vel á hann hvaðan sem er úr áhorfendastæðunum.

Áhorfendur gátu séð þarna endursýningar frá mörkunum í leikjunum en Finnarnir voru þó ekki að endursýna vítaspyrnudómana eða aðrar umdeildar ákvarðanir rússneska dómarans sem hölluðu mikið á íslenska liðið.