Guus Hiddink saknar andrúmsloftsins í enska boltanum

Guus Hiddink, þjálfari rússneska landsliðsins, sagði það á blaðamannafundi fyrir leikinn á móti Wales í undankeppni HM í kvöld, að hann hefði áhuga á að stýra aftur liði í ensku úrvalsdeildinni.

Hiddink gerði frábæra hluti með Chelsea á síðasta tímabili en varð að hætta með liðið þar sem hann var enn þjálfari rússneska landsliðins. Hiddink fékk sérstak leyfi hjá rússneska sambandinu til að klára tímabilið með Chelsea eftir að félagið rak Luiz Felipe Scolari.

„Ég átti ánægjulegan tíma í Englandi og áður en ég stjórnaði Chelsea fylgdist ég reglulega með ensku úrvalsdeildinni," sagði Hiddink. "Ég elska andrúmsloftið í enska boltanum og auðvita sakna ég þess," sagði Hiddink. Hann sagðist hafa nótið þess að vinna með leikmönnum Chelsea.

Hiddink hefur líka trú á enska landsliðinu á HM. „England er að spila nútíma fótbolta, eru skynsamir, klókir og spila fallegan fótbolta. Þeir geta farið alla leið í Suður-Afríku," sagði Hiddink.

Englendingum vantar aðeins einn sigur til þess að komast á HM en Rússar eru enn í harðri baráttu við Þjóðverja um sigurinn í sínum riðli.