McAllister boðið að aðstoða Burley

Skoska knattspyrnusambandið hefur boðið Gary McAllister, fyrrum fyrirliða skoska landsilðsins, að gerast þjálfari og aðstoðarmaður George Burley landsliðsþjálfara.

„George hefur þegar rætt við Gary og þetta er undir þeim komið. Ef báðir eru ánægðir munum við ekki standa í vegi fyrir þessu enda undir George sjálfum komið hverja hann vill fá til liðs við sig," sagði Gordon Smith, framkvæmdarstjóri skoska knattspyrnusambandsins.

Steven Pressley hætti sem aðstoðarmaður Burley til að einbeita sér að starfi sínu hjá Falkirk þar sem hann er aðstoðarknattspyrnustjóri.

Skotar mæta Japönum í vináttulandsleik í næsta mánuði og vill Burley ganga frá ráðningu eftirmanns Pressley fyrir þann tíma.