Chelsea gæti náð að versla í janúar

Chelsea gæti fengið að kaupa leikmenn í félagaskiptaglugganum í janúar, þrátt fyrir kaup-bannið sem FIFA setti á klúbbinn. Bannið er tilkomið vegna kaupanna á Gael Kakuta frá Lens árið 2007 en franska félagið vill meina að Chelsea hafi neitt hann til að rifta samningi sínum og farið síðan til Englands.

Chelsea var fyrir vikið meinað að kaupa leikmenn í næstu tveimur félagaskiptagluggum, í janúar og svo næsta sumar. Chelsea er vægast sagt ósátt við þetta og mun áfrýja.

Áfrýjunin fer til CAS, Áfrýjunardómstóls Íþróttamála og hefur Chelsea 21 dag til að áfrýja. Mun það væntanlega nýta allan þann tíma þar sem bannið er ekki í gildi þar til áfrýjunardómstóllinn kveður upp úrskurð sinn.

Og það gæti tekið sinn tíma. „Þetta fer eftir því hvenær félagið áfrýjar. Ef það gerist innan viku er raunhæft að áætla að réttarhöld fari fram í nóvember og ákvörðun verði tekin í desember. Ef félagið áfrýjar ekki strax gæti þetta allt dregist og félagið gæti þess vegna verslað í janúar," sagði Matthieu Reed, framkvæmdastjóri áfrýjunardómstólsins.