Fordæma ákvörðun Einars um hvalveiðar

Samtök ferðaþjónustunnar fordæma ákvörðun Einars K. Guðfinssonar, starfandi sjávarútvegsráðherra, að heimila hvalveiðar og telja með ólíkindum að slík ákvörðun skuli tekin af ráðherra sem er að hætta störfum.

„Ljóst er að ekki hefur verið haft samráð við þá stjórn sem nú situr og enn síður við þá sem eru að mynda nýja stjórn en þar er mikil andstaða við hvalveiðar. Varla getur leikið vafi á því að næsta ríkisstjórn afturkalli leyfið," segir í tilkynningu samtakanna.

Umfjöllun um Ísland erlendis hefur verið mjög neikvæð allt frá því er bankarnir hrundu og hafa ýktar lýsingar á óeirðum hér á landi nýlega bæst við í heimspressunni án þess að Íslendingar fái rönd við reist, segir í tilkynningu. „Það verður mikil vinna að endurreisa ímynd Íslands. Stórfelldar hvalveiðar munu bæta í vandann."

„Hvalveiðar, ekki síst stórhvalaveiði, skapa mikla gagnrýni í okkar helstu viðskiptalöndum og á undanförnum árum hafa ítrekað komið fram dæmi um að neytendur sniðgangi íslenskar vörur og þjónustu vegna þeirra hvalveiða sem stundaðar hafa verið á undanförnum árum."

Samtökin segja að hrefnuveiði undanfarinna ára hafi nú þegar skaðað hvalaskoðunina mikið og sífellt færri hrefnur sjáist á þeim svæðum sem hvalaskoðunarbátar nýta. „Hvalaskoðun hefur verið sú grein innan ferðaþjónustunnar sem hefur vaxið hvað hraðast á undanförnum árum með tilheyrandi fjölda starfa og virðisauka fyrir íslenska þjóðarbú, það er því alveg ljóst að með þessari ákvörðun er verið að skaða þessa uppbyggingu og kasta frá sér meiri hagsmunum fyrir minni."

Samtök ferðaþjónustunnar hvetja næstu ríkisstjórn til þess að afturkalla þessa heimild.