Fyrrverandi ráðherrar styðja Pál Magnússon

Tveir fyrrverandi ráðherrar Framsóknarflokksins lýsa yfir stuðningi við Pál Magnússon í framboði til formanns Framsóknarflokksins. Kosið er á morgun.

Þeir Jón Kristjánsson, fyrrverandi heilbrigðisráðherra, og Guðmundur Bjarnason, fyrrverandi landbúnaðar- og umhverfisráðherra, segja að Framsóknarflokkurinn þurfi að vera reiðubúinn til þess að taka þátt í stjórnarmyndun sem gæti gerst þegar á þessu ári. Nýr formaður Framsóknarflokksins fái ekki aðlögunartíma eða hveitibrauðsdaga. Guðmundur og Jón segjast telja að Páll Magnússon sé vaxinn þeim vanda að takast á við þessar aðstæður.

Ráðherrarnir fyrrverandi benda á tveggja áratuga reynslu Páls af stjórnmálastarfi og segja hann vera fulltrúa þeirrar kynslóðar sem verði að taka upp merkið næstu árin.