Heimilin fái greiðsluplan en fyrirtækin afskrifað

Þingmenn spurðu ráðherra um verklagsreglur bankanna og um traust á bankakerfinu í gær, í kjölfar frétta af hugsanlegum milljarða afskriftum Nýja Kaupþings á skuldum 1998, sem á Haga, sem á meðal annars Bónus. Því var haldið fram að bankar færu mýkri höndum um fyrirtæki en einstaklinga.

„Þegar íslenskur almenningur þarf að leggja sig allan fram um að standa undir skuldabyrðinni og stendur ekki annað til boða en að fá nýtt greiðsluplan, berast fregnir af miklum afskriftum og það er ólík meðferð í kerfinu,“ sagði Bjarni Benediktsson, þingmaður Sjálfstæðisflokks. Ferlið ætti að vera gagnsætt, ekki bara hjá heimilum heldur hjá fyrirtækjum líka.

Steingrímur J. Sigfússon fjármálaráðherra svaraði með því að nú sæi fyrir endann á því að nýtt bankakerfi væri mótað. Ný bankasýsla ætti að fylgjast með því að eigendastefna ríkisins næði fram að ganga.

Þá minnti Bjarni á að heilt ár væri síðan ljóst var að það þyrfti að taka þessi mál traustum tökum.

„Ef bankakerfið getur þetta ekki verðum við að grípa inn í,“ sagði hann. Steingrímur sagðist þá gera ráð fyrir að Bjarni færi ekki fram á pólitíska íhlutun í einstök mál.

Málflutningur Lilju Mósesdóttur, þingmanns VG, var á svipuðum nótum. Reglur í Nýja Kaupþingi, um áframhaldandi þátttöku eigenda og stjórnenda, eftir endurskipulagningu skulda, byggi á því að þeir njóti trausts.

„Þessar reglur virðast ekki koma í veg fyrir það að einn helsti forystumaður útrásarinnar haldi skuldsettu fyrirtæki sínu að lokinni endurskipulagningu,“ sagði hún og spurði hvort eigendur og stjórnendur ættu ekki að bera ábyrgð á gjörðum sínum.

Þingmaður Framsóknar, Eygló Harðardóttir, hefur farið fram á fund í viðskiptanefnd Alþingis vegna málsins. - kóþ