Edda: Mamma gengur um gólf heima þegar við erum að spila.

Edda Garðarsdóttir er spennt fyrir því að fá að mæta besta liði heims en Ísland og Þýskaland mætast í dag í lokaleik stelpnanna okkar á EM í Finnlandi. Leikurinn hefst klukkan 13.00 að íslenskum tíma.

„Þetta er besta lið í heimi og þvílík áskorun fyrir okkur alveg saman hvernig það er á það litið. Við erum heldur ekki búnar að spila við þær mjög lengi," segir Edda og bætti við:

„Ég held að ég hafi einu sinni verið í liðinu þegar við spiluðum á móti Þýskalandi og þá held ég að við höfum tapað 7-0. Síðasti leikurinn við þær tapaðist 5-0 fyrir einhverjum árum síðan," sagði Edda.

„Maður var fyrst að átta sig almennilega á því þegar maður kom inn á hótel eftir Noregsleikinn að draumurinn væri úti. Það er frábært að fá leik strax. Þegar maður dettur á bakið þá þarf maður að drullast aftur upp og halda áfram. Það er nóg eftir af tímabilinu úti en samt er þetta sárt og drullumikil vonbrigði," sagði Edda.

Edda segist finna fyrir því að allir heima eru að fylgjast með. „Það eru allir í liðinu staðráðnir í að gefa ekkert eftir fyrir fólkið sem er heima því það eru ótrúlega margir að fylgjast með okkur. Ég veit að mamma gengur um gólf heima þegar við erum að spila. Öll fjölskyldan, kunningjar og vinir sem maður hefur verið í sambandi við í gegnum árin, gamlir vinnufélagar og allir sem hafa kynnst stelpunum í hópnum eru þvílíkt að fylgjast með okkur á mótinu. Það er hvatning fyrir okkur," sagði Edda.