Forseti skoska knattspyrnusambandsins biðst afsökunar

George Peat, forseti skoska knattspyrnusambandsins, hefur beðist afsökunar á að kenna Chris Iwelumo um ófarir skoska landsliðsins.

Peat lét hafa eftir sér að ef Iwelumo hefði skorað úr dauðafæri sem hann fékk er Skotar og Norðmenn gerðu jafntefli á Hampden Park í undankeppni HM 2010 væri staða Skota allt önnur í riðlinum.

Skotar eru nú með sjö stig í riðlinum, jafn mörg og Makedónía og einu meira en Norðmenn þegar tvær umferðir eru eftir af riðlakeppninni.

Skotar mæta Makedóníu í dag og Íslendingar taka á móti Norðmönnum.

„Ég notaði dæmi Chris Iwelumo til að sýna hvað það getur verið stutt á milli hláturs og gráturs í alþjóðlegri knattspyrnu," sagði Peat í yfirlýsingu sem birt var í dag.

„Ummælum mínum hefur verið tekið sem gagnrýni á leikmanninn og það harma ég. Það var ekki ætlun mín og mér þykir leitt að málið fór í þennan farveg."

„Ég biðst afsökunar á þessum mistökum og vona að allir geti nú einbeitt sér að lokaspretti riðlakeppninnar."