Alonso og Mascherano ekki á förum frá Liverpool

Enska úrvalsdeildarfélagið Liverpool hefur sent frá sér tilkynningu um að miðjumennirnir Xabi Alonso og Javier Mascherano séu alls ekki á förum frá félaginu.

„Þrátt fyrir orðróma um framtíð Alonso og Mascherano í fjölmiðlum undanfarið vill Liverpool ítreka að ekkert kauptilboð hefur borist í leikmennina. Hvorugur þeirra er heldur til sölu og Liverpool hefur ekki áhuga á þeim langa lista leikmanna sem er orðaður við félagið í skiptum fyrir Alonso eða Mascherano," segir á opinberri heimasíðu Liverpool.

Knattspyrnustjórinn Rafa Benitez svaraði sögusögnum um að Meistaradeildarmeistarar Barcelona væru á höttunum eftir Mascherano þannig að spænska félagið hefði ekki efni á að kaupa hann. Liverpool myndi ekki einu sinni selja hann á 50 milljónir punda.