Þær sænsku kveiktu í þeim norsku með ummælum á Facebook

Norska kvennalandsliðið í fótbolta vann mjög óvæntan 3-1 sigur á Svíþjóð í átta liða úrslitum Evrópukeppni kvennalandsliða í Finnlandi en norsku stelpurnar voru eins og kunnugt er með íslenska liðinu í riðli og máttu þakka fyrir 1-0 sigur á Stelpunum okkar.

Þjálfari norska liðsins sagði eftir sigurleikinn á Svíum að sigurvissa Svía og hrokafull ummæli á Facebook hafi hjálpað mikið til að gera sínar stelpur enn klárari í leikinn á móti Svíum.

„Ég las þetta ekki enda orðinn alltof gamall fyrir Facebook. Leikmennirnir mínir eru hinsvegar mikið inn á Facebook og þar voru þær sænsku með stórar yfirlýsingar sem fóru ekki alltof vel í mitt lið," sagði Bjarne Berntsen, þjálfari norska liðsins.

Noregur mætir Þýskalandi í dag í seinni undanúrslitaleiknum á EM en England tryggði sér sæti í úrslitaleiknum með 2-1 sigri á Hollandi í framlengdum leik í gær. Leikurinn í dag hefst klukkan 16.00 að íslenskum tíma.