Katrín Ómarsdóttir byrjar á móti Frökkum - Dóra á bekknum

Sigurður Ragnar Eyjólfsson, þjálfari kvennalandsliðsins, er búinn að birta byrjunarliðið sitt fyrir fyrsta leikinn á EM sem verður á móti Frökkum annað kvöld en þetta er fyrsti leikur íslensk knattspyrnulandsliðs á stórmóti.

Sigurður Ragnar gerir eina breytingu á liðinu sem byrjaði á móti Serbíu í undankeppni HM um síðustu helgi en stelpurnar unnu þær serbnesku þá 5-0. Katrín Ómarsdóttir kemur inn á miðjuna í staðinn fyrir Dóru Stefánsdóttur. Katrín átti mjög góða innkomu í seinni hálfleik í leiknum á móti Serbum.

Níu af þessum ellefu leikmönnum byrjuðu leikinn á móti Frökkum fyrir ári síðan en Ásta Árnadóttir var þá í hægri bakvarðarstöðunni í stað Ernu Bjarkar Sigurðardóttur og Dóra Stefánsdóttir spilaði inn á miðjunni í stað Katrínar Ómarsdóttur.

Byrjunarlið Íslands á móti Frökkum á morgun:

Markvörður: Þóra Björg Helgadóttir

Hægri bakvörður: Erna Björk Sigurðardóttir

Miðvörður: Katrín Jónsdóttir

Miðvörður: Guðrún Sóley Gunnarsdóttir

Vinstri bakvörður: Ólína Guðbjörg Viðarsdóttir

Varnartengiliður: Edda Garðarsdóttir

Varnartengiliður: Katrín Ómarsdóttir

Sóknartengilður: Sara Björk Gunnarsdóttir

Hægri kantur: Dóra María Lárusdóttir

Vinstri kantur: Hólmfríður Magnúsdóttir

Framherji: Margrét Lára Viðarsdóttir