Man. City verður nánast ósigrandi með Eto´o

Brasilíumaðurinn Robinho er afar spenntur fyrir því að fá Kamerúnann Samuel Eto´o til Man. City og er á því að liðið yrði hreinlega ósigrandi með hann í liðinu.

City er á höttunum eftir Eto´o en félagið hefur þegar keypt Roque Santa Cruz í framlínuna og er talið vera nálægt kaupum á Carlos Tevez.

„Ef Eto´o kemur líka þá fáum við meiri hæfileika í hópinn. Við þurfum á fjórum alvöru framherjum að halda fyrir næsta tímabil vegna þess að tímabilið er svo erfitt á Englandi," sagði Robinho.

„Ég vona að félagið kaupi fleiri leikmenn í þessum gæðaflokki. Ef félagið gerir það verðum við nánast ósigrandi."