Krefst rannsóknar á kúasæðingu Audda

Dýralæknafélag Íslands krefst rannsóknar á kúasæðingu Auðuns Blöndal sem fjallað var um í Fréttablaðinu í dag. „Þeir eru að gera eitthvað sem leikmenn mega ekki gera og þetta er niðurlægjandi fyrir dýrið. Tiltækið er fámunalega ósmekklegt og það er spurning hvort þetta sé ekki dýraverndarmál," segir Guðbjörg Þorvarðardóttir, formaður Dýralæknafélag Íslands, sem er allt annað en sátt með framgöngu sjónvarpmannanna Auðuns Blöndal og Sverris Þór Sverrissonar, betur þekktir sem Auddi og Sveppi.

Í Fréttablaðinu í dag er fjallað um nýlega ferð þeirra á bæinn Tannstaðabakka í Hrútafirði þar sem þeir kynntu sér líf íslenskra bænda. Meðal þess sem þeir tóku sér fyrir hendur var að sæða kú. Afrakstur ferðarinnar verður sýndur síðar í vikulegum sjónvarpsþætti Audda og Sveppa á Stöð 2.

Guðbjörg segir að fréttin hafi vakið hörð viðbrögð og fjölmargir haft samband við skrifstofu Dýralæknafélagsins. Í tilkynningu frá félaginu er lýst yfir vanþóknun með fréttina og myndbirtinguna í Fréttablaðinu.

„Í þessu sambandi vekur Dýralæknafélag Íslands athygli á að um sæðingar nautgripa og annarra dýra gilda ákveðin lög og reglur er varða dýravernd og fagþekkingu frjótækna. Dýralæknafélag Íslands mælist til þess að umrætt atvik verði rannsakað af þær til bærum yfirvöldum," segir að lokum í tilkynningu félagsins.

Guðbjörg segir að Dýralæknafélagið ætli að biðla til yfirstjórnar Stöðvar 2 að umrætt atriði verði ekki sýnt í þætti þeirra Audda og Sveppa.

Frétt Fréttablaðsins er hægt að nálgast hér fyrir neðan.