Slysið á Fílbeinsströndinni hefur engin áhrif á HM 2010

Skipuleggjendurnir á HM í Suður-Afríku 2010 hafa ekki áhyggjur af því að slysið á Fílabeinsströndinni sé eitthvað sem gæti gerst á HM í Suður-Afríku á næsta ári.

Að minnsta kosti 22 manns létust í troðningi á leik Fílabeinsstrandarinnar og Malaví í undankeppni HM á Fílabeinsströndinni í gær.

Á blaðamannafundi í morgun sagði Danny Jordaan, yfirmaður skipulagningarnefndar HM, að aðalástæðan fyrir slysi eins og í gær sé að áhorfendur séu að kaupa miða á leikina á síðustu stundu og þeir séu að kaupa miðana fyrir utan leikvöllinn.

Jordaan sagði að með því safnist saman mikill fólksfjöldi fyrir utan völlinn rétt fyrir leik og það gæti verið kveikjan að slysum sem þessum en yfir hundrað manns hafa dáið í slysum sem þessum í Afríku undanfarin áratug.

Jordaan sagði að allir miðar á leiki á HM 2010 verði að vera keyptir löngu fyrir leik og þá munu þeir sem ekki hafa miða vera stoppaðir í nokkra kílómetra fjarlægð frá vellinum. Hann sagði einnig að áhorfendur verði hvattir til að mæta snemma á leikina.