Ritstjóri með áhyggjur af rauðhærðri frænku sinni

„Eins og ég sé þetta þá er verið að boða árás á ættmenni mín og börn," segir Eiríkur Jónsson, ritstjóri Séð og Heyrt, um „Kick a ginger day" sem hefur verið boðaður á Facebook.

Eins og Vísir hefur greint frá þá er tilgangur dagsins að beita rauðhærða ofbeldi og hefur verið auglýstur á vefsvæði Facebook. Samtök Heimilis og Skóla hafa sent út viðvörun vegna málsins. Það hafa skólastjórnendur í Kópavogi einnig gert.

Eiríkur bloggar af þessu tilefni á heimasíðu sína. Hann bendir á að sonur sinn er rauðhærður.

„Svo hef ég líka áhyggjur af Ólínu Þorvarðardóttur frænku minni," segir Eiríkur í viðtali við Vísi en þau eru bræðrabörn. Ólína er þingkona Samfylkingarinnar.

Eiríkur segir hana vera með fallegt rautt hár en grunar að hún viðhaldi fallega rauðum litnum.

„Rauði liturinn þynnist nefnilega út með árunum," útskýrir Eiríkur sem vill slá skjaldborg um rauðhærða enda fjölmargir í hans fjölskyldu með rautt hár.

Eiríkur er hinsvegar dökkhærður og kann ekki að skýra það sérstaklega. Hann er þó ekki sá eini í fjölskyldunni að eigin sögn.

„Það þarf að reisa skjaldborg í kringum þá rauðhærðu eins og heimilin," segir Eiríkur sem er tilbúinn að taka slaginn gegn þeim sem eru hugsanlega handgengnir þessum ósmekklega degi.