Jóhanna á lista yfir valdamestu konur heims

Jóhanna Sigurðardóttir forsætisráðhera hefur í fysta sinn náð inn á árlegan lista sem tekinn er saman yfir 100 valdamestu konur heimsins.

Jóhanna vermir 74. sæti listans og kemst á blað fyrir tilraunir sínar til þess að koma Íslandi á réttan kjöl eftir að bankarnir hrundu.  Annar nýliði, Frú Michelle Obama forsetafrú er í fertugasta sæti á listanum og á eftir henni í fertgasta og fyrsta og fertugasta og öðru sæti koma þær Oprah Winfrey sjónvarpsstjarna og Elisabet Englandsdrottning.

Það er hins vegar þýski kanslarinn Angela Merkel sem hreppir efsta sætið en það er í fjórða sinn sem hún nær þeim árangri. Listinn er tekinn saman af tímaritinu Forbes og við röðun í sæti er tekið tillit til áhrifa viðkomandi á efnahagslífið og áhrifa í fjölmiðlum auk þess sem litið er til þess hve hátt í metorðastigann viðkomandi konur hafa komist.

Flestar kvennanna á listanum eru stjórnendur í risafyrirtækjum víða um heim og til að mynda er Angela Merkel eini stjórnmálamaðurinn sem kemst inn á topp tíu listann.

Listann í heild sinni má sjá hér.