Guðrún Sóley hvíldi í dag - Reynir þurfti að hefta hausinn í miðjum leik

Guðrún Sóley Gunnarsdóttir, varnarmaður íslenska kvennalandsliðsins, tók ekki þátt í æfingu dagsins en hún er að jafna sig eftir að hafa fengið gat á hausinn í leiknum á móti Frökkum. Guðrún lét það þó ekki stoppa sig og kláraði leikinn á meðan að franska stelpan fór strax útaf.

„Ég er með smá hausverk en það er ekkert meira en það," sagði Guðrún í dag. „Þetta var ekkert vont þegar þetta gerðist en það kom gat á hausinn og Reynir þurfti að hefta hausinn í miðjum leik," segir Guðrún.

Guðrún segir það aldrei hafa komið til greina að fara útaf þrátt fyrir að hafa fundið til óþæginda og ógleði í hálfleik.

„Ég fékk aðeins smá ógleði og yfirliðstilfinningu í hálfleik og þess vegna kom ég seint út. Það kom aldrei til greina að fara útaf eða koma ekki inn eftir hálfleikinn. Þetta gekk síðan vel í seinni hálfleik og þetta var ekki að trufla mig mjög mikið," segir Guðrún Sóley.

Guðrún segir að liðið sé að komast yfir tapið á móti Frökkum. „Þetta voru gríðarleg vonbrigði að tapa leiknum og við vorum allar mjög svekktar. Við erum búnar að fara yfir leikinn á fundi, ætlum núna að leggja hann til hliðar, reyna að læra af honum og mæta í næsta leik," sagði Guðrún Sóley.