Samfylkingin hyggst skerpa á stefnumálum sínum

Samfylkingin ætlar að halda Framtíðarþing á laugardag eftir viku þar sem „leitað verður lausna á brýnustu verkefnum í stjórnmálum samtímans en jafnframt horft til framtíðar með áherslu á þau gildi, stefnumið og forgangsröðun sem eiga að ráða för við endurreisn Íslands í kjölfar bankahrunsins" eins og segir í tilkynningu frá framkvæmdastjóra flokksins.

Áherslan verður lögð á virka þátttöku flokksmanna og annarra sem áhuga hafa á að leiða fram nýjar hugmyndir og lausnir.. Meðal þeirra málaflokka sem verða teknir til skoðunar á fundinum eru fjármál ríkisins, atvinnumál, efnahagsmál og utanríkismál.

Þá tilkynntu forystumenn Samfylkingarinnar það á blaðamannfundi í dag að flokkurinn hygðist efna til opinna funda um land allt á næstu vikum um Evrópumálin og þau meginsvið sem samið yrði um í aðildarviðræðum við Evrópusambandið. Á þessum fundum muni fræðimenn, innlendir og erlendir sérfræðingar í Evrópumálum, stjórnmálamenn og hagsmunaaðilar skiptast á skoðunum um Evrópumálin. Meðal þátttakenda verði Michael Köhler forstöðumaður á skrifstofu sjávarútvegsmála innan ESB, Pekka Pesonen framkvæmdastjóri Evrópsku bændasamtakanna, Alyson Bailes gestaprófessor, Jón Baldvin Hannibalsson fyrrverandi utanríkisráðherra, Friðrik J. Arngrímsson framkvæmdastjóri LÍÚ, Erna Bjarnadóttir hagfræðingur Bændasamtakanna, Elvira Mendez Piledo lektor við lagadeild Háskóla Íslands, ráðherrar og þingmenn Samfylkingarinnar og margir fleiri.