Margrét Lára: Þetta gætu orðið tveir langir dagar

Margrét Lára Viðarsdóttir og félagar í íslenska kvennalandsliðinu eru tilbúnar í slaginn á EM sem hefst með leik gegn Frökkum annað kvöld. Stelpurnar eru búnar að koma sér vel fyrir í Tampere og bíða núna bara eftir því að geta farið að taka á Frökkunum í fyrsta leik.

„Þetta gæti orðið tveir langir dagar. Við erum orðnar gríðarlega spenntar og maður vill helst ekki bíða lengur," sagði Margrét Lára en hún fagnar því samt að þær fái tíma til að venjast öllu í Tampere.

„Það munar þremur tímum á Finnlandi og Íslandi og sá tímamismunur getur svolítið ruglað mann. Við vorum lengi að sofna í gærkvöldi (fyrrakvöld) og vorum svolítið þreyttar í morgun (í gær). Það er gott að við fáum nokkra daga til þess að ná því úr okkur," sagði Margrét Lára.

Margrét Lára hefur litlar áhyggjur af því þótt að Siurður Ragnar Eyjólfsson, landsliðsþjálfari, hafi ekki nýtt sér allar æfingarnar sem voru á dagskránni.

„Það eru allir í toppformi og ég held að ein æfing til eða frá skipti ekki sköpum. Ég held að það skipti mestu máli að við séum úthvíldar þegar í leikinn er komið og við séum með hausinn í lagi. Formið mun ekki vera okkar veikleiki á þessu móti," sagði Margrét Lára.