Dacourt til Standard Liege

Olivier Dacourt hefur ákveðið að ganga til liðs við belgíska félagið Standard Liege en hann hefur verið samningslaus síðan hann hætti hjá Inter á Ítalíu í sumar.

Dacourt er 34 ára gamall miðvallarleikmaður frá Frakklandi sem lék með Everton og Leeds á Englandi áður en hann fór til Ítalíu þar sem hann lék bæði með Roma og Inter.

Hann kom hins vegar lítið við sögu hjá Inter í fyrra og virtist ekki eiga framtíð hjá félaginu undir stjórn Jose Mourinho. Hann var um tíma lánaður til Fulham.

Dacourt má þó ekki spila með Standard Liege í Meistaradeildinni í vetur.