John Terry: Er enn að svekkja sig yfir Króatíutapinu fyrir tveimur árum

John Terry, fyrirliði enska landsliðsins, segir liðið skulda ensku þjóðinni að vinna leikinn á móti Króatíu í kvöld og ná þar með að hefna fyrir tapið á Wembley fyrir tveimur árum sem kostaði enska landsliðið sæti á EM 2008. Terry segir að tapið hafi skilið eftir sig jafnslæma tilfinningu og þegar hann klikkaði á víti í úrslitaleik Meistaradeildarinnar í Moskvu.

„Ég hef átt slæma daga á mínum ferli, úrslitaleikurinn í Meistaradeildinni og að komast ekki á Em voru tveir þeir verstu," sagði Terry sem var meiddur í umræddum tapleik á móti Króötum í nóvember 2007.

„Þegar þú ert fyrirliði þá ertu með liðið á herðum þér og tók því afar persónulega að við skyldum ekki komast á Evrópumótið," segir Terry.

„Þessi tapleikur hefur verið að angra mig í langan tíma og ég vakna enn upp um miðja nótt og hugsa um þetta kvöld. Það er er enginn að tala um hefnd en það hefur enginn enskur landsliðsmaður heldur gleymt þessum leik," segir Terry.

„Það var kannski enn verra að sitja upp í stúku og geta ekkert gert. Það skiptir mig því rosalega miklu máli persónulega að við komumst á HM til þess að geta bætt fyrir þetta klúður. Við skuldum ensku þjóðinni að klára verkefnið," segir Terry.

Leikur Englendinga og Króata hefst klukkna 19,00 að íslenskum tíma og verður í beinni útsendingu á Stöð2 Sport. Með sigri tryggja Englendingar sér sigur í riðlinum og þar með sæti á HM í Suður-Afríku næsta sumar.