Númer 11 tekið úr umferð þegar Giggs hættir?

Breska blaðið News of the World greinir frá því í dag að til greina komi að Manchester United muni taka treyju númer ellefu úr umferð til heiðurs Ryan Giggs þegar hann leggur skóna á hilluna.

Sagt er að óformlegar viðræður hafi átt sér stað hjá félaginu um að heiðra einn sigursælasta leikmann í sögu félagsins með eftirminnilegum hætti, jafnvel með því að hengja treyju hans upp í rjáfur og taka hana úr umferð.

Ryan Giggs hefur náð ótrúlegum árangri með United síðan hann gekk í raðir félagsins sem unglingur. Hann hefur spilað flesta leiki í sögu United, unnið flesta titla og hefur skorað á hverju tímabili frá því úrvalsdeildin var stofnuð árið 1992.

Giggs hefur unnið 10 meistaratitla á 19 ára ferli, fjóra enska bikara, tvo Meistaradeildartitla, þrjá deildarbikara, einn ofurbikar, einn álfubikar og einn heimsmeistaratitil félagsliða.