Sigurður Ragnar tilkynnir byrjunarliðið eftir fund í kvöld

Sigurður Ragnar Eyjólfsson, landsliðsþjálfari, tilkynnir byrjunarlið íslenska landsliðsins fyrir fyrsta leikinn á EM ekki fyrr en á liðsfundi í kvöld. Sigurður Ragnar vildi ekkert gefa neitt upp um hvort liðið myndi eitthvað breytast frá því 5-0 sigri á Serbíu um síðustu helgi.

„Ég ákveð liðið aldrei fyrr en á síðustu stundu. Auðvítað hefur maður ákveðnar hugmyndir og stundum breytast þær ekki en stundum koma upp breytingar. Það er ómögulegt að segja hvað verður ofan á því ég er að velta fyrir mér hlutum," sagði Sigurður Ragnar sem segir samkeppnin hjálpa til við að fá sem mest út úr æfingunum.

„Stelpurnar eru ennþá í samkeppni um að vera í byrjunarliðinu og eru staðráðnar í því að standa sig. Það er mjög jákvætt hvað við eigum marga góða leikmenn. Mér finnst ég geta kallað á allar í 22 manna hópnum inn á og ég veit að þær munu standa sig," sagði Sigurður Ragnar.

Byrjunarliðið mun koma inn á Vísi strax eftir fundinn en hann hefst klukkan 22.00 að finnskum tíma sem klukkan 19.00 að íslenskum tíma.