Umfjöllun: Stórsigur Stjörnunnar gegn Fram

Stjarnan er í 2.sæti Pepsi-deildar karla eftir stórsigur á Fram í Garðabæ í kvöld. Framarar sitja hins vegar í 9.sætinu með 5 stig.

Fyrri hálfleikurinn í gær var algjörlega eign heimamanna. Stjörnumenn voru miklu betri á öllum sviðum fótboltans og þar fyrir utan mun grimmari í öllum návígjum.

Strax á 12.mínútu kom Halldór Orri Björnsson heimamönnum yfir þegar hann afgreiddi boltann glæsilega í netið eftir sendingu Guðna Rúnars Helgasonar, en Halldór Orri átti mjög góðan leik í kvöld.

Framarar hresstust eilítið um miðjan hálfleikinn og á 25.mínútu fékk Hjálmar Þórarinsson dauðafæri sem hann náði ekki að nýta. Þremur mínútum síðar skoraði hinn 19 ára Arnar Már Björgvinsson síðan annað mark Stjörnunnar eftir klafs í teignum, en Arnar Már var í fyrsta skipti í byrjunarliði Stjörnunnar í kvöld eftir að hafa skorað 4 mörk sem varamaður í leikjum Stjörnunnar til þessa.

Þorvaldur Örlygsson þjálfari Fram var greinilega ósáttur við leik sinna manna í fyrri hálfleik því hann skipti þremur varamönnum inná á leikhléi. Það bar hins vegar ekki tilætlaðan árangur þó svo að leikur Fram hafi aðeins skánað í síðari hálfleik.

Stjörnumenn færðu sig aðeins aftar á völlinn eftir hlé og beittu eitruðum skyndisóknum. Það bar árangur því á 65.mínútu skoraði Arnar Már sitt annað mark eftir að hafa sloppið í gegnum vörn Fram og klárað færið frábærlega. Arnar er þar með orðinn markahæstur í Pepsi-deildinni með 6 mörk í 7 leikjum.

Þremur mínútum síðar skoraði Halldór Orri svo á nýjan leik eftir skelfilegan varnarleik Framara. Eftir það slökuðu heimamenn aðeins á og Framarar fengu nokkur færi undir lokin. Ingvar Ólason nýtti eitt þeirra þegar hann skoraði með skalla eftir hornspyrnu.

Niðurstaðan 4-1 sigur Stjörnunnar sem sitja sem fastast í 2.sæti deildarinnar, tveimur stigum á eftir Íslandsmeisturum FH.

Stjarnan - Fram 4-1

1-0 Halldór Orri Björnsson (12.mín)

2-0 Arnar Már Björgvinsson (28.mín)

3-0 Arnar Már Björgvinsson (65.mín)

4-0 Halldór Orri Björnsson (68.mín)

4-1 Ingvar Þór Ólason (78.mín)

Stjörnuvöllur. Áhorfendur: Ekki gefið upp

Dómari: Þorvaldur Árnason (4)

Skot (á mark): 17-8 (8-3)

Varin skot: Bjarni 2 - Hannes 3

Horn: 8 - 4

Aukaspyrnur fengnar: 9 - 6

Rangstöður: 4 - 2

Stjarnan (4-5-1)

Bjarni Þórður Halldórsson 5

Guðni Rúnar Helgason 6

(76 Bjarki Páll Eysteinsson -)

Tryggvi Sveinn Bjarnason 7

Daníel Laxdal 7

Hafsteinn Rúnar Helgason 7

Arnar Már Björgvinsson 8

(83 Andri Sigurjónsson -)

Birgir Hrafn Birgisson 7

(83 Ellert Hreinsson -)

Steinþór Freyr Þorsteinsson 8

Björn Pálsson 7

Halldór Orri Björnsson 8 - Maður leiksins

Þorvaldur Árnason 6

Fram (4-5-1)

Hannes Þór Halldórsson 4

Almarr Ormarsson 3

Auðun Helgason 3

Jón Guðni Fjóluson 2

Samuel Tillen 3

Ívar Björnsson 4

(46 Alexander Veigar Þórarinsson 5)

Halldór Hermann Jónsson 4

Paul McShane 4

Daði Guðmundsson 2

(46 Ingvar Þór Ólason 5)

Josep Tillen 3

(46 Heiðar Geir Júlíusson 5)

Hjálmar Þórarinsson 3



Smelltu hér til að opna Boltavaktina og lesa lýsingu leiksins: Stjarnan - Fram.

Þá er einnig hægt að nálgast Boltavaktina í Vodafone Live! farsímaþjónustunni.