Gerrard vill ólmur verða meistari

Steven Gerrard sagði í samtali við News of the World að hann vildi ólmur sigra í ensku úrvalsdeildinni með Liverpool.

Liverpool mætir Tottenham í fyrstu umferð deildarinnar í dag en margir sparkspekingar reikna með því að Liverpool muni fara langt í deildinni í vetur.

„Ég vill ólmur fá mynd af mér og liðsfélögum mínum með bikarinn á lofti," sagði Gerrard.

Liverpool varð í öðru sæti deildarinnar í fyrra en hefur ekki orðið meistari síðan 1990. „Maður verður að hefja hvert tímabil eins vel undirbúinn og maður getur verið. Ég hef fulla trú á því að okkur muni takast þetta," sagði hann.

Liðið var Evrópumeistari árið 2005 en Gerrard segir að það væri enn stærra að verða enskur meistari þar sem það er svo langt síðan að Liverpool vann þann titil.

„Það skiptir öllu máli fyrir mig að verða meistari með Liverpool. Mér dettur ekki í hug að fara til annars félags og verða meistari með því. Ég mun ekki gefast upp á því að verða meistari á Anfield."