Þýskaland Evrópumeistari í fimmta skiptið í röð

Það virðist ekkert geta stöðvað sigurgöngu kvennalandsliðs Þýskalands en liðið vann 2-6 stórsigur gegn Englandi í bráðskemmtilegum úrslitaleik á EM í Finnlandi í dag.

Þýskaland vann þar með sinn sjöunda Evrópumeistaratitil og sinn fimmta titil í röð en þær þýsku unnu einnig árin 2005, 2001, 1997 og 1995.

Það var vel við hæfi að Birgit Prinz opnaði markareikninginn fyrir þær þýsku á 20. mínútu með sínu fyrsta marki á mótinu en aðeins tveimur mínútum síðar bætti Melanie Behringer við öðru marki fyrir þær þýsku. Karen Carney náði að minnka muninn stuttu síðar og staðan var 1-2 í hálfleik.

Markaveislan hélt áfram í síðari hálfleik og Kim Kulig bætti við þriðja markinu fyrir Þjóðverja á 51. mínútu en þær ensku voru ekki af baki dottnar og Kelly Smith minnkaði muninn á nýjan leik.

Þá var komið að markadrottningunni Inku Grings en tvö mörk frá henni á tíu mínútna kafla um miðbik síðari hálfleiks gerðu út um leikinn.

Prinz bætti svo við sjötta markinu áður en yfir lauk en sigur Þjóðverja var í raun aldrei í hættu því um leið og þegar þær ensku virtust vera að komast inn í leikinn þá kom þýskt mark.