Walter Smith fékk fjögurra leikja bann

Walter Smith, knattspyrnustjóri Rangers, hefur verið dæmdur í fjögurra leikja bann af skoska knattspyrnusambandinu.

Smith fékk reisupassann í leik Rangers og Kilmarnock á laugardaginn eftir að hann mótmælti dómgæslu leiksins harkalega.

Hann taldi að leikmenn Kilmarnock væru að reyna að fá dómarann til að gefa Pedro Mendes sína aðra áminningu í leiknum og þar með rautt.

Smith reyndist hins vegar hafa rangt fyrir sér og viðurkenndi mistök sín eftir leikinn. Hann sagðist þá ekki ætla að áfrýja þeirri refsingu sem hann fengi.

Samkvæmt reglum skoska knattspyrnusambandsins fær Smith sjálfkrafa tveggja leikja bann fyrir atvikið. Hins vegar var ákveðið að bæta tveimur leikjum við bannið þar sem Smith var einnig rekinn af velli í leik Rangers og Hibernian í mars á þessu ári og var þá beðinn um að gæta að hegðun sinni í framtíðinni.

Smith mun ekki geta stýrt liði sínu á ný fyrr en 1. nóvember og missir til að mynda af leik Rangers gegn Celtic í næsta mánuði.