Auddi og Sveppi fengu einka-blaðamannafund með Sigurði og stelpunum

Eftir hinn venjulega UEFA-blaðamannafund fyrir leik Íslands og Þýskalands birtust tveir vel þekktir íslenskir grínarar og sjónvarpsmenn, Auddi og Sveppi, í salnum.

Þeir fengu að spyrja Margréti Láru Viðarsdóttur, Eddu Garðarsdóttur og Sigurð Ragnar Eyjólfsson, landsliðsþjálfara, óvenjulegra spurninga sem áttu flestar ekkert skylt við knattspyrnu.

Auddi og Sveppi voru að taka upp efni fyrir sjónvarpsþáttinn sinn á Stöð 2 og það er von að sjá afraksturinn á næstu vikum. Strákarnir fengu einnig þjálfara þýska landsliðsins í viðtal þar sem Sveppi fór í gervi íslensk íþróttafréttamanns og Auddi var túlkur.

Sigurður og stelpurnar stóðu sig vel þrátt fyrir að fá margar furðulegar spurningar og það ætti enginn áhugamaður um kvennalandsliðið að missa af blaðamannafundi Audda og Sveppa þegar upptakan verður sýnd á Stöð 2.