Henry neitar því að hafa lesið yfir Domenech þjálfara

Thierry Henry, fyrirliði franska landsliðsins, hefur neitað að hafa gagnrýnt landsliðsþjálfarann Raymond Domenech eftir að franska blaðið Le Parisien hafði eftir samtal hans við Domenech þjálfara þar sem Henry átti að hafa sagt að leikmönnum leiddist á æfingum og að þeir væru síðan týndir inn á vellinum.

„Við ræddum saman en það var bara á jákvæðu nótunum," sagði Henry og vildi ekkert gefa upp um hvað hann talið við Domenech þar sem það ætti aðeins heima innan liðsins. Henry segir að andrúmsloftið innan liðsins sé frábært. „Það eina sem við þurfum að einbeita okkur að núna er að komast á HM," sagði Henry.

Franska landsliðið er komið til Serbíu þar sem efstu lið riðilsins mætast. Serbarnir eru með fjögurra stiga forskot á Frakka og geta því tryggt sér sæti á HM með sigri en hvernig sem fer er líklegt að Frakkar þurfi að komast á HM í gegnum umspilið.