Svíar óttast að Zlatan ætli að hætta í sænska landsliðinu

Svíar hafa áhyggjur af því að Zlatan Ibrahimovic ætli að hætta að spila með sænska landsliðinu. Svíar eru ekki í alltof góðri stöðu í undankeppni HM en sigurmark Zlatans í uppbótartíma á móti Ungverjum um síðustu helgi hélt lífi í voninni um að komast á HM í Suður-Afríku.

Það óttast nú margir Svíar að Zlatan vilji einbeita sér að því að spila með Barcelona og hann sjálfur hefur ekki gefið nein skýr svör um framhaldið.

„Ég veit ekki hvað ég geri. Við erum að reyna að komast á næstu HM og svo verður bara staðan skoðuð eftir HM," sagði Zlatan á blaðamannafundi.

Zlatan hefur áður hætt í landsliðinu eftir að hann tók því illa að vera settur í bann vegna þess að hann skellti sér á næturklúbb, ásamt liðsfélögunum Christian Wilhelmsson og Olof Mellberg, tveimur dögum fyirr landsleik á móti Liechtenstein.

Landsliðsþjálfarinn setti þó alla út úr liðinu í næsta leik og Zlatan fór í fýlu og gaf ekki kost á sér í landsliðið fyrr en ári síðar.