Ferguson: Meistaradeildareinvígið ræður öllu

Sir Alex Ferguson, stjóri Manchester United, segir að einvígi Liverpool og Chelsea í Meistaradeildinni muni skera úr um það hvort liðið muni veita United keppni um enska meistaratitilinn.

United vann í dag gríðarlega mikilvægan 3-2 sigur á Aston Villa og náði eins stigs forystu á toppnum á ný og á leik til góða.

"Það er gott fyrir andann að koma svona til baka og vinna eftir að hafa verið undir, en ég lít á titilslaginn með öðrum augum en margir aðrir," sagði Ferguson eftir leikinn í dag.

"Margir eru að segja að Liverpool sé málið í dag og það má til sanns vegar færa af því liðið er á góðu róli þessa dagana. Við erum hinsvegar í betri stöðu og ég held að sigurvegarinn í einvígi Chelsea og Liverpool í Meistaradeildinni verði helsti keppinautur okkar í titilbaráttunni. Liðið sem fer áfram úr þessari rimmu mun verða klárt í slaginn," sagði Ferguson.