Stanlislas framlengir við West Ham

Hinn nítján ára gamli Junior Stanislas hefur framlengt samning sinn við West Ham til loka tímabilsins 2013.

Stanislas hefur leikið tvo leiki með aðalliði West Ham og skoraði í 2-0 sigri liðsins gegn Sunderland um helgina. Það var hans fyrsti leikur í byrjunarliði West Ham.

„Það er gott að vera búinn að skrifa undir," sagði Stanislas á heimasíðu West Ham. „Ég er búinn að leggja mikið á mig á æfingum og mér hefur gengið vel. Að fá nýjan samning er því góður bónus."

Stanislas lék nýverið með U-20 landsliði Englands en hann er þriðji ungi leikmaðurinn sem West Ham semur í vikunni. Nú á þriðjudeginn var tilkynnt að þeir Mark Noble og James Tomkins hefðu framlengt samninga sína við félagið.