Moyes: Forráðamenn City sýna okkur enga virðingu

Knattspyrnustjórinn David Moyes hjá Everton er allt annað en sáttur með hvernig forráðamenn Manchester City hafa hundelt varnarmanninn Joleon Lescott í sumar.

City heldur áfram að bjóða í leikmanninn þrátt fyrir að forráðamenn Everton hafa ítrekað líst því yfir að hann sé ekki til sölu.

Everton hefur þegar hafnað tveimur kauptilboðum uppá á 15 og 18 milljónir punda og nú er þriðja kauptilboðið talið vera í burðarliðnum upp á 22 milljónir punda.

Lescott er sagður órólegur yfir stöðu mála og nokkur bresku dagblaðanna vilja meina að hann ætli að fara fram á að vera settur á sölulista til þess að komast til City.

Hvernig sem málin fara á endanum þá er Moyes óhress með viðskiptahætti forráðamanna City.

„Þetta snýst um virðinug og forráðamenn City eru ekki að sýna okkur neina virðingu. Ef ég væri knattspyrnustjóri City myndi ég eflaust reyna að kaupa bestu leikmennina en ég mynda haga viðskiptum mínum með öðrum hætti.

Ég myndi ekki reyna að fara bak við félögin og knattspyrnustjórana heldur tala við þá fyrst. Knattspyrnustjórar eiga að geta rætt málin þannig að allt sé upp á borðinu. Það er rétta leiðin og þannig á það að vera," segir Moyes í viðtali við Sunday Mirror.