Aron Einar tryggði Coventry jafntefli gegn Everton

Landsliðsmaðurinn Aron Einar Gunnarsson hjá Coventry var í eldlínunni þegar b-deildar félagið mætti úrvalsdeildarfélagi Everton í æfingarleik í dag en leikar fóru 2-2.

Aron Einar lék allan leikinn og skoraði jöfnunarmark Coventry í blálokin. Jo kom Everton yfir eftir að stundarfjórðungur var liðinn af leiknum en Michael Doyle jafnaði á 34. mínútu og staðan var 1-1 þegar flautað var til hálfleiks.

Allt stefndi svo í að Everton myndi stela sigrinum þegar Joes Baxter skoraði á 85. mínútu þangað til Aron Einar skallaði boltann í netið á 88. mínútu eftir sendingu Doyle og þar við sat.

Athygli vakti að Joleon Lescott var ekki í leikmannahópi Everton í leiknum en hann er nú sterklega orðaður við Manchester City eftir að félagið lagði á borðið meint þriðja kauptilboð upp á 22 milljónir punda í varnarmanninn.