Ancelotti: City getur ekki keypt bestu leikmenn heims

Knattspyrnustjórinn Carlo Ancelotti hjá Chelsea efaðist aldrei um að fyrirliðinn John Terry yrði áfram í herbúðum Lundúnafélagsins þó svo að forráðamenn Manchester City hafi veifað peningum framan í leikmanninn.

Ancelotti segir að peningar geti ekki keypt hvað sem er og að City sé ekki í þeirri stöðu til þess að fá bestu leikmenn heims.

„Þið sjáið bara að það sama gerðist með Terry og Kaka. Það var alveg sama sagan. Auðvitað eru peningar mikilvægir fyrir leikmenn á borð við þá en það sem skiptir meira máli er að vera í góðu liði og berjast um þá titla sem í boði eru.

Leikmenn í fremstu röð á borð við Terry og Kaka eru virtir af liðsfélögum sínum og félögunum sjálfum og því er útilokað að þeir færi sig um set þegar félag eins og City kemur kallandi bara út af peningum," segir Ancelotti í viðtali við News of the World.