Newcastle ætlar ekki að flýta sér að selja Bassong

Varnarmaðurinn Sebastien Bassong hjá Newcastle hefur verið eftirsóttur í sumar eftir að félagið féll úr ensku úrvalsdeildinni á síðustu leiktíð en Tottenham, Everton, Arsenal og Manchester City er öll sögð fylgjast vel með gangi mála hjá Frakkanum.

Forráðamenn Newcastle búast vð því að missa leikmanninn í sumar en eru hins vegar sagðir ætla að flýta sér hægt í að selja leikmanninn vegna þess mikla áhuga sem er á honum.

Samkvæmt heimildum Sky Sports fréttastofunnar hefur Newcastle þegar neitað 10 milljón punda kauptilboði í hinn 23 ára gamla Bassong.

Talið var að kauptilboðið hafi verið frá Tottenham en knattspyrnustjórinn Harry Redknapp neitar því staðfastlega en viðurkennir að hann hafi áhuga á leikmanninum.

„Það er ekki rétt að við höfum lagt fram kauptilboð í Bassong en ég er hrifinn af leikmanninum. Hann er ungur og efnilegur og framtíðina fyrir sér,“ segir Redknapp sem vill væntanlega styrkja varnarlínu sína fyrir komandi tímabil þar sem varnarmennirnir Jonathan Woodgate, Michael Dawson og Ledley King hafa allir verið að glíma við meiðsli undanfarið.