Argentínumenn töpuðu aftur - nú fyrir Paragvæ sem komst á HM

Staða Argentínumanna í undankeppni HM er orðin enn verri eftir 0-1 tap fyrir Paragvæ í nótt. Tapið þýðir að Argentínumenn eru komnir niður í 5. sæti í Suður-Ameríku riðlinum en aðeins fjögur efstu liðin komast beint inn á HM. Liðið í 5. sætið spilar umspilsleiki við lið úr Norður- og Mið-Ameríku.

Það var Nelson Haedo Valdez, leikmaður Borussia Dortmund í þýsku bundesligunni sem skoraði sigurmark Paragvæ á 28. mínútu leiksins. Markið tryggði Paragvæ farseðilinn á HM í Suður-Afríku.

Þetta var þriðja tap argentínska liðsins í röð í undankeppninni en liðið hafði áður tapað fyrir Ekvador (0-2) og Brasilíu (1-3). Ekvador komst fyrir vikið upp fyrir Argentínu eftir 3-1 útisigur í Bólivíu. Ekvador er með 23 stig eða einu stigi meira en lærisveinar Diego Armando Maradona.

Argentínumenn eru reyndar allt annað en öruggir með fimmta sætið því Úrúgvæ og Venesúela unnu bæði í gær og eru aðeins stigi á eftir í 6. og 7. sæti. Það stefnir því í æsispennandi lokasprett en aðeins tvær umferðir eru eftir. Argentínumenn eiga eftir að mæta Perú á heimavelli og Úrúgvæ á útivelli.